toki tan lipu pi jan Koele

sitelen li tan lipu ni

toki pi jan Koele. ona li jan lawa lon ma tomo Elusalen.

jan Koele li toki: ale li ala! ken la jan li kama jo e mani mute. taso, ona li pona tawa ona anu seme?

kulupu jan li kama tawa ma li weka e ma. tenpo ale la ma li awen.
suno li kama li weka li tawa tu tawa ma pi open ona.
kon li tawa nasin wan en nasin tu; ona li sike.
telo linja ale li tawa telo suli; telo suli li pini ala jo e telo.

wawa li weka e jan.
oko li lukin mute la oko li wile e lukin sin.
kute li kute mute la kute li wile e kute sin.
tenpo ijo la jan li toki: "o lukin! mi lukin e ijo sin!"
ni li ala. ijo ala li sin.

mi jan Koele li jan lawa pi ma Isaeli.
mi kama sona e ale. ni li ijo ike!
mi lukin e ale li sona e ni: ale li ala.
ijo sike li ken ala linja; ijo ike li ken ala pona.
sona li suli la pilin ike li suli!

mi toki e ni: "mi musi mute!" taso, ona li ala.
mi wile sona e nasa la mi moku e telo nasa.

mi kama jo
e tomo mute
e ma kili mute
e tomo telo mute
e jan pali mute
e soweli mute
e kiwen jelo mute
e ijo mute pi jan lawa ante
e jan mute pi kalama musi
e ijo ante mute mute
e ale!
jan ale pi ma tomo Elusalen li jo e mani lili; mi jo e mani suli.

taso mi pilin e ni: ni li ala.
jan li ken kama jo e ijo sin? tenpo pini la jan ante li kama jo e ale!

pini la mi pilin ike tan mani mi.
ken la mi pana e mani tawa lili mi.
taso mi sona ala e ni:
tenpo kama la lili mi li jan nasa anu jan sona?
tenpo ijo la jan li kama jo e mani mute li pana e ona tawa jan lili ike.
ni li ike.

mi kama jo e sona mute.
mi wile sona e ni: nasin seme li pona tawa jan?
open la mi pilin e ni tawa sona:
suno li pona; pimeja li ike.
sona li pona; nasa li ike.
taso, pini la mi pilin e ni tawa sona:
jan sona en jan nasa li tawa nasin wan li moli sama!
mi kama jo e sona tawa seme?

jan li pali tawa seme?
tenpo suno la ona li pali,
tenpo pimeja la ona li ken ala awen!

nasin ale li ike, nasin ni li pona:
o moku, o musi, o pilin pona tan pali sina!
taso, pilin pona li tan jan sewi.
jan sewi li pana e pona tawa jan wan li weka e pona tan jan tu!
pali li ala tan ni.

tenpo li lon tawa ale.
tenpo open en tenpo moli;
tenpo pi weka kasi en tenpo pi kama jo e kasi;
tenpo pakala en tenpo pona;
tenpo pi telo oko en tenpo musi;
tenpo pi pana kiwen en tenpo pi kama jo e kiwen;
tenpo pi pakala e len en tenpo pi pali e len;
tenpo toki en tenpo pi toki ala;
tenpo olin en tenpo pi seli ike;
tenpo utala en tenpo awen.

mi sona e ni: jan en soweli li sama.
ona li moli la ona li tawa ma sama.
jan li moku li pilin pona la pona ni li tan jan sewi.
jan ken ala pona e pali pi jan sewi.
ni li suli tan ni: jan li jo e tenpo pi sike suno lili!

mani li lili, nimi pona li suli.
suno open li lili, suno moli li suli.
jan sona li lon tomo moli;
jan pi sona ala li lon tomo musi.

jan toki e ni: "tenpo weka li pona, tenpo ni li ike".
toki ni li toki pi sona ala!

tenpo pi mute lili la jan pona li kama e ike en jan ike li kama e pona.
tenpo pi mute lili la jan pona li pali e ike en jan ike li pali e pona.

mi lukin e ni:
jan pi sijelo pona li jan pi nanpa wan ala lon tawa musi.
jan wawa li jan pi nanpa wan ala lon utala.
jan sona li jo ala e pan mute e mani mute.
tenpo li utala e ale.

tenpo wan la jan suli li utala e ma tomo lili.
jan sona wan pi ma tomo li jo e mani lili. ona li pana luka tawa ma tomo li pona e ona. jan suli li weka.
Taso, tenpo lili la jan pi ma tomo li sona ala e jan sona!
mi toki e ni: "wawa li lili, sona li suli. taso, sona pi jan pi mani ala li weka".

jan pali e ko pi kon pona. pipi lili li moli li tawa kon li pakala e ona.
jan li jo e sona e nimi pona. nasa lili li pakala e ona.

jan li pali e lupa lon ma la jan li tawa anpa lupa.
jan li wile kama jo e ijo pi jan ante li pakala e poka tomo la akesi li moli e ona.
jan li kama jo e kiwen pona li sijelo ona li wawa lili.
taso, jan li kama jo e kasi kiwen la jan li seli tan ni.

o musi tan tenpo pi lili sina! sina jo ala e tempo mute.
tenpo kama la sina ken ala.
tenpo kama la wile sina en unpa sina li weka.
tenpo kama la suno en mun li seli ala.
tenpo kama la jan wawa pi ma tomo sina li weka.
tenpo kama la lape sina li weka tan waso.
tenpo kama la kalama li lili la sina tawa tomo pi tenpo ale.
tenpo kama la ko li kama tu tawa ma.